नेपाल अनलाइन पत्रिका। प्रदीप खड्का स्टारर फिल्म ‘एक्टर’को छायांकन सम्पन्न भएको छ। गत वैशाख महिनाको अन्त्यतिर पोखराको विन्ध्वासिनी मन्दिरमा पूजा गर्दै सुरु भएको सुटिङ ४५ दिनमा सकिएको हो।
पोखरामा १० दिन र काठमाडौंमा ३५ दिन खिचेपछि फिल्मको एउटा गीत खिच्न बाँकी राख्दै सम्पूर्ण छायांकन सकिएको निर्माता थमन कुमार भण्डारीले जानकारी दिएका छन्। बाँकी गीतको छायांकन युरोपमा गर्ने योजना छ।
फिल्मको डेब्यु निर्देशक राजन भुसाल हुन्। मुख्य कलाकारहरूमा प्रदीप खड्का, दिव्या देव, राजबल्लभ कोइराला, आना शर्मा, सुशील सिटौला, उषा रजक, प्रदीप चौधरी ‘पिके’, बादल भट्ट, अनोज पाण्डे, सुप्रज्ञा शर्मा, सिर्जना अधिकारी आदि छन्। दिव्या देवको यो पहिलो फिल्म हो भने राजबल्लभ कोइराला करिब दश वर्षपछि कमब्याक गर्दैछन्।
फिल्मका निर्माता थमन कुमार भण्डारी हुन् भने सह-निर्माता एनिस भुसाल र क्रियटिभ प्रोड्युसर मोती कार्की छन्। छायांकन नरेन्द्र मैनालीले गरेका छन्।
फिल्म यस वर्षको तिहारको अवसर पारेर कात्तिक १५ गते लक्ष्मीपूजामा रिलिज हुने योजना छ। फिल्मको जापान प्रदर्शन अधिकार म्याक्स इटरटेन्टमेन्टका खेम राज शाहले खरिद गरिसकेका छन्।