नेपालमा मनसुन भित्रिएको एक साता बितिसक्दा पनि यो प्रणाली सुस्त गतिमा अगाडि बढिरहेको छ भन्ने कुरा जल तथा मौसम विज्ञान विभाग, मौसम पूर्वानुमान महाशाखाले जनाएको छ।
महाशाखाका वरिष्ठ मौसमविद् प्रतिभा मानन्धरका अनुसार मनसुन अहिले कोशी प्रदेशको पूर्वी र उत्तरी भेगमा केन्द्रित छ, जहाँ अधिकतर जिल्लाहरूमा वर्षात् भइरहेको छ। मनसुनी प्रणाली सुस्त गतिमा रहेकाले देशभर फैलिन अझै एक साताभन्दा बढी समय लाग्ने अनुमान गरिएको छ।
नेपालमा मनसुन भित्रिएको लामो समय भइसके पनि यो निकै सुस्त गतिमा रहेकोले संघीय राजधानी काठमाडौं आइपुग्न अझै केही दिन लाग्ने मौसमविद् प्रतिभा मानन्धरले बताएकी छिन्। कोशी प्रदेशको पूर्वतिर रहेको मनसुन पश्चिमतर्फ विस्तार हुँदै छ, तर यो निकै सुस्त गतिमा छ। मानन्धरका अनुसार, मनसुन काठमाडौं आइपुग्न दुईदेखि तीन दिन लाग्नेछ भने काठमाडौं पुगेको पाँचदेखि सात दिनपछि मात्रै सुदूरपश्चिम क्षेत्रमा पुग्ने देखिन्छ।
अघिल्लो वर्षको मनसुन पनि देशभर फैलिन करिब तीन हप्ता लागेको थियो, र यस वर्ष जुन १० मा मनसुन प्रवेश गरेको छ। महाशाखाका अनुसार गण्डकी प्रदेश र सुदूरपश्चिम प्रदेशमा पश्चिमी वायुका साथै स्थानीय वायुको प्रभावले नयाँ प्रणालीको विकास भए पनि वर्षा प्रभावकारी हुन सकेको छैन। गण्डकीको पोखरा आसपास र सुदूरपश्चिमको दार्चुलामा मात्रै हल्का वर्षा भइरहेको छ।
अहिले कोशी, मधेस, र बागमती प्रदेशमा आंशिक बदली रहेको छ र बागमती प्रदेशका एक–दुई स्थानमा मात्रै हल्का वर्षा भएको छ। महाशाखाले जारी गरेको बुलेटिन अनुसार, हाल देशको पूर्वी भूभागमा मनसुनी प्रणालीको प्रभाव छ भने बाँकी भूभागमा स्थानीय वायु तथा भारत आसपास रहेको न्यूनचापीय क्षेत्रको आंशिक प्रभाव रहेको छ।
आज राति कोशी प्रदेश, मधेस प्रदेश, बागमती प्रदेश, र गण्डकी प्रदेशका केही स्थानमा तथा बाँकी भूभागका एक–दुई स्थानमा हल्कादेखि मध्यम वर्षाको सम्भावना रहेको छ।