क्रिकेटर दिपेन्द्र सिंह ऐरीले आईसीसीको पुरुष टी-२० अलराउन्डर रैंकिङमा आफ्नो स्थान सुधार गरेका छन्। पहिले नवौं स्थानमा रहेका उनले छैटौं स्थानमा उक्लिएका छन्।
हालसालैको टी-२० विश्वकपमा गरेको उत्कृष्ट प्रदर्शन पछि दिपेन्द्रको रैंकिङ सुधार भएको हो। आईसीसीले हालसालै सार्वजनिक गरेको नयाँ रैंकिङमा, दिपेन्द्र तीन स्थान माथि उक्लेर छैटौं स्थानमा पुगेका छन्।
टी-२० अलराउन्डर रैंकिङमा अस्ट्रेलियाका मार्कस स्टोइनिसले अफगानिस्तानका मोहम्मद नबीलाई उछिन्दै शीर्ष स्थान कब्जा गरेका छन्। बंगलादेशका शाकिब अल हसन दोस्रो स्थानमा छन्। चौथो स्थानमा रहेका शाकिब दुई स्थान माथि उक्लेर दोस्रो स्थानमा पुगेका छन्।
यसैबीच, पहिले शीर्ष स्थानमा रहेका नबी चौथो स्थानमा झरेका छन्। जिम्बाब्वेका सिकन्दर रजा पाँचौं स्थानमा छन्। दिपेन्द्रपछाडि भारतका हार्दिक पाण्ड्या सातौं स्थानमा छन्।