नेपाल अनलाइन पत्रिका। नेपाल कम्युनिष्ट पार्टी (एमाले) का महासचिव शङ्कर पोख्रेलले दाङको घोराहीमा प्रेस चौतारी दाङको आयोजनामा भएको पत्रकार सम्मेलनमा संसद्का दुई ठूला दल, कांग्रेस र एमाले, मिल्नुको विकल्प नभएको बताए। उनले मुलुकको प्राप्त उपलब्धिको रक्षा र देशको विकासका लागि यी दुई दलको सहकार्य आवश्यक रहेको बताए।
पोख्रेलले भने, “हामी सरकारमा जानका लागि मात्रै मिलेका होइनौं, देश विकासका लागि सहकार्य गरेका हौं। लोकतन्त्रमा दुई ठूला दल मिलेर मात्रै निकास निस्कने भएकाले सहकार्य गरिएको हो।”
उनले पुराना दलहरू चाहिंदैन भन्ने भाष्यलाई अस्वीकार गर्दै मुलुकको विकास र समृद्धिका लागि पुराना र स्थापित दलहरू नै आवश्यक रहेको बताए। पोख्रेलले ठूला दलकै कारण मुलुकमा विकास र परिवर्तन भएको पनि उल्लेख गरे।
यस अवसरमा, उनले लुम्बिनी प्रदेशका नवनिर्वाचित मुख्यमन्त्री चेतनारायण आचार्यलाई प्रदेशको औचित्य पुष्टि हुने गरी काम गर्न सुझाव दिए।
कार्यक्रममा लुम्बिनी प्रदेशका मुख्यमन्त्री चेतनारायण आचार्य, प्रदेशका सरकार मन्त्री भुमेश्वर ढाकाललगायतका नेता तथा कार्यकर्ताहरूको उपस्थिति थियो।