नेपाल अनलाइन पत्रिका। प्रमुख प्रतिपक्ष दल नेकपा माओवादी केन्द्रका सांसद अमनलाल मोदीले कांग्रेस र एमालेले भ्रष्टाचारको फाइल बन्द गर्न मिलेको आरोप लगाएका छन्। प्रतिनिधिसभा बैठकमा विशेष समयमा बोल्दै सांसद मोदीले संविधान संशोधन गर्ने भनेर जनतामा भ्रम छरेर भ्रष्टाचारबाट मुक्ति पाउने कामलाई लागिपरेको जिकिर गरे।
सांसद मोदीले गिरीबन्धुदेखि भुटानी शरणार्थीसम्मका भ्रष्टाचारका मुद्दाहरू उल्लेख गर्दै भने, “त्यसको विषयमा पहिलाको सरकारले जस्तै काम निरन्तरता दिन्छ कि दिँदैन, यसलाई अगाडि बढाउँछ कि बढाउँदैन भन्ने महत्वपूर्ण कुरा हो।” उनले कांग्रेस र एमाले आफूसँग सम्बन्धित भ्रष्टाचारसँग जोडिएका फाइलहरू बन्द गर्न मिलेको आरोप लगाए।
उनले त्यसविरुद्ध बुलन्द आवाज लिएर जनतामा जाने प्रतिवद्धता व्यक्त गरे। सांसद मोदीले भ्रष्टाचारको विरुद्धमा कठोर कदम चाल्नुपर्ने र दोषीलाई कडा कारबाही गर्नुपर्ने माग गर्दै संसदमा आफ्नो धारणा प्रस्तुत गरे। उनका अनुसार भ्रष्टाचारको अन्त्यले मात्रै देशको समृद्धि र विकास सम्भव छ।