नेपाली कांग्रेस र नेकपा एमालेबीच सत्ता गठबन्धन गर्ने र एमाले अध्यक्ष केपी शर्मा ओलीको नेतृत्वमा नयाँ सरकार गठन गर्ने सहमति भएको छ। संसदका प्रमुख दुई दलले यो सहमति गरेपछि निर्वाचन प्रणालीमा सुधार लगायतका विषयमा संविधान संशोधन गर्ने पनि निर्णय गरेका छन्।
कांग्रेसका एक नेताले जानकारी दिएअनुसार, सहमतिको अन्तिम रूप दिन कांग्रेस सभापति शेरबहादुर देउवा सोमबार राति नै प्रमुख सचेतक रमेश लेखक लगायतका नेताहरूसँग ओली निवास बालकोट जाने सम्भावना रहेको छ।
सोमबार साँझ ललितपुरको झम्सिखेलस्थित होटल भिभान्तामा बसेर एमाले महासचिव शंकर पोखरेल र कांग्रेसका प्रमुख सचेतक रमेश लेखकले सहमतिको अन्तिम टुंगो लगाएका थिए। सहमतिमा हस्ताक्षर सोमबार राति नै हुने सम्भावना रहेको ती नेताले बताएका छन्।
संविधान संशोधनका लागि पूर्वप्रधानन्यायाधीश कल्याण श्रेष्ठको नेतृत्वमा ‘संविधान संशोधन सुझाव समिति’ बनाउने योजना पनि छ। एमाले-माओवादी गठबन्धन कायम राख्न चाहने एमालेका एक पदाधिकारीले कांग्रेस-एमालेबीच सहमतिमा हस्ताक्षर हुने संकेत गरेका छन्।
उनले भने, “एमाले-माओवादी गठबन्धन जोगिने स्थिति देखिएन। आजै कांग्रेस-एमालेबीच हस्ताक्षर हुन्छ कि हुँदैन भन्ने म भन्न सक्दिनँ, तर अहिलेको गठबन्धन नजोगिने पक्का भयो।”
यो सहमति संसदका दुई प्रमुख दलबीचको राजनीतिक स्थिरता र निर्वाचन प्रणालीमा सुधारका लागि महत्वपूर्ण कदम हुनेछ।