नेपाल अनलाइन पत्रिका। भारतमा निर्वासनमा रहेकी बङ्गलादेशकी पूर्वप्रधानमन्त्री शेख हसिनाले आफ्ना बुवा, बङ्गबन्धु शेख मुजिबुर रहमान, जसको नेतृत्वमा बङ्गलादेशले स्वतन्त्रता हासिल गरेको थियो, उनको अपमान भएको भन्दै गुनासो गरेकी छन्।
बङ्गलादेशमा चर्किएको विद्यार्थी आन्दोलन नियन्त्रण गर्न नसकेर सेनाको सहयोगमा देश छोडेर अगस्ट ५ मा भारत पुगेकी शेख हसिनाले भनेकी छन्, “उनीहरू (प्रदर्शनकारी)ले मेरो बुवाको अपमान गरेका छन्। म देशवासीसँग न्यायका लागि अपील गर्छु।” शेख हसिनाको यो बयान उनका छोरा सजीव वाजिद जोयलाई उद्धृत गर्दै विभिन्न सञ्चारमाध्यममा आएको हो। उनले आफ्नी आमाको यो भनाइ सामाजिक सञ्जालमा पोस्ट गरेका छन्। शेख हसिनाले बङ्गलादेशी नागरिकहरूलाई अगस्ट १५ मा आफ्ना पिता शेख मुजिबुर रहमानको पुण्यतिथि मनाउन आग्रह गरेकी छन्। स्मरणीय छ, मुजिबुर रहमानको १९७५ को अगस्ट १५ मा गोली हानी हत्या गरिएको थियो।
यसैबीच, बङ्गलादेशको अन्तरिम सरकारले अगस्ट १५ को सार्वजनिक बिदा पनि रद्द गरिदिएको छ। शेख हसिनाले विद्यार्थी आन्दोलनका क्रममा मारिएका ५ सयभन्दा बढी मानिसलाई श्रद्धाञ्जली दिँदै भनेकी छन्, “जुलाईदेखि अहिलेसम्म आन्दोलनको नाममा भएको तोडफोड, आगजनी र हिंसामा धेरैले ज्यान गुमाएका छन्। म उहाँहरूको आत्माको चिरशान्तिको कामना गर्दछु र समवेदना प्रकट गर्दछु।
उनीहरूसँग म छु, म जस्तै जो आफ्नो प्रियजन गुमाएको पीडासँग जिउँदै मरेका छन्।” आन्दोलनमा धेरै विद्यार्थी, शिक्षक, प्रहरी, पत्रकार, अवामी लिगका नेता र सामाजिक कार्यकर्ताहरू मारिएका छन्। शेख हसिनाले यी हत्या र बर्बरतामा संलग्नहरूलाई कडा सजायको माग गर्दै भनेकी छन्, “म यी हत्यामा संलग्न दोषीहरूलाई कडा सजाय दिन माग गर्दछु।”