नेपाल अनलाइन पत्रिका। भारतको झाँसी निवासी ३१ वर्षीय कार्पेन्टार, नीरज विश्वकर्माको कथा अहिले चर्चामा छ। नीरजले दुई वर्षअघि रिचा सोनिसँग प्रेम विवाह गरेका थिए। रिचाले पढाई जारी राख्ने इच्छा व्यक्त गरेपछि नीरजले उनकी पत्नीको शिक्षा पूरा गराउनका लागि मजदुरी गर्न थाले। उनले रिचालाई आर्थिक सहयोग गर्न ऋण पनि लिएका थिए। रिचा जनवरी २०२४ मा लेखपाल (राजस्व अधिकारी) पदमा चयन भएकी थिइन्।
तर, लेखपाल बनेपछि, रिचाले नीरजलाई छोडेर गइन् र विवाहको तथ्यलाई अस्वीकार गरिन्। नीरजसँग विवाहको प्रमाण र तस्बिरहरू हुँदाहुँदै पनि रिचाले विवाह नभएको दाबी गरिन्।
नीरजले पुलिस र अधिकारीहरूसँग सहयोगको अपिल गरेका छन्। रिचाको जवाफमा उनले नीरजले धम्की दिने र ब्ल्याकमेल गर्ने आरोप लगाउँदै, विवाहको प्रमाणपत्र नक्कली भएको बताएकी छन्। उनीहरूको प्रेम सम्बन्धले गर्दा रिचालाई उनको परिवारले घरबाट निकालेको थियो भन्ने पनि बताइएको छ।
यो घटना एक व्यक्तिले आफ्नो पत्नीको भविष्यका लागि गरेको त्याग र त्यसको प्रतिफलको एउटा कठोर उदाहरण हो। नीरज अहिले न्यायको खोजीमा छन्।