स्वास्थ्य तथा जनसङ्ख्या मन्त्री प्रदीप यादवले सोमबार मन्त्रालयमा आयोजित पत्रकार सम्मेलनमा अस्पतालहरूको सुधार नै आफ्नो मुख्य लक्ष्य रहेको बताउनुभएको छ। उहाँले स्वास्थ्य संस्थाको सुधारका लागि मन्त्रालय रातदिन काम गरिरहेको जानकारी दिनुभयो।
मन्त्री यादवले राजनीतिक अस्थिरताका कारण ठूला प्रतिबद्धताहरू जनाउन कठिन भएको उल्लेख गर्दै, अहिले भएका संरचनालाई अझ व्यवस्थित गर्न आफू लागिपरेको बताउनुभयो। अस्पताल सुधारका लागि मन्त्रालयका अतिरिक्त दुई जना सचिवको नेतृत्वमा काम भइरहेको पनि उहाँले बताउनुभयो।
उहाँले स्वास्थ्य क्षेत्रमा जनशक्ति कम रहेको समस्या स्वीकार्दै, करारमा कर्मचारी लिएर भए पनि काम गराउने प्रतिबद्धता व्यक्त गर्नुभयो। मन्त्रालय मातहतका अस्पतालको सुधारका लागि विभिन्न कार्यक्रमहरू अघि बढिरहेको पनि जानकारी दिनुभयो।
बिमामा धेरै समस्या रहेको बताउँदै, स्वास्थ्य बिमा मन्त्रालयअन्तर्गत नभएको र राज्यले बिमालाई स्वायत्त गरिदिएको जानकारी दिनुभयो। उहाँले बिमा बोर्डका अध्यक्षसँग कुरा गरेर बिमामा भएका बेथितिको सुधार गर्ने बताउनुभयो र सबै नागरिकलाई बिमामा समेट्ने लक्ष्य रहेको उल्लेख गर्नुभयो।
मन्त्री यादवले भने, “अस्पतालहरूको सुधार नै मेरो मुख्य लक्ष्य हो। सुधार कसरी गर्ने त्यसमै म आएदेखि नै लागिपरेको छु। सुधार गर्नको निमित्त अघि बढेका छौँ। राजनीति स्थिर छैन, अस्थिरता छ। जहाँ अस्थिरता हुन्छ, त्यहाँ ठूला ठूला क्रान्तिकारी कुरा गरेर सम्भव पनि हुँदैन। त्यसकारण जुन हाम्रो अवस्था छ, त्यसलाई कसरी सुधार गर्ने, त्यसमा हामीले अघि बढेर काम गरिरहेका छौँ। सबै कुरा बुझेका छैनौँ तर अधिकतम कुरा बुझेर काम गरिरहेका छौँ।”
उहाँले मन्त्रालय स्वास्थ्य क्षेत्रको सुधारका लागि लगातार लागिरहेको बताउनुभयो।